Професор на факултет го намали бројот на испитни прашања од дваесет на три за да им го олесни подготвувањето на студентите. Првото прашање барало да објаснат сè што се обработувало до првиот колоквиум, второто сè по него, а третото сè што пропуштиле додека учеле за друг предмет.

„Кога рече три прашања, го прашав дали ќе бидат од цела книга. Ми рече дека книгата е добро место за почеток“, изјави студентката Мила. Таа го напишала насловот на првата лекција и кренала рака да праша дали има ограничување на должината. Професорот ѝ рекол дека има, бидејќи по нив салата ја користи друга група.

На половина од испитот снемало дополнителни листови. Професорот ги замолил студентите да ги пишуваат примерите на задната страна, а ако и таму нема место, да наведат само каде во учебникот можат да се најдат.

Мила го предала испитот со одговор на сите три прашања. На секое ја навела страницата од која почнува поглавјето. Професорот ѝ одбил бод бидејќи заборавила да го наведе и предговорот.