СКОПЈЕ — Долгогодишен навивач на маалски фудбалски клуб побара управата да му ја надомести победата од неделниот натпревар, која му го расипала тикетот. Тој нагласи дека останува верен на клубот, но дека верноста не ја ослободува екипата од одговорност за непредвидливи резултати.

„Шест недели не можат да состават два паса, а баш денес решија да играат“, изјави навивачот Александар, 32, кој уплатил на пораз како мерка на претпазливост. При водечкиот гол станал од седиштето по навика, но веднаш седнал кога сфатил дека напаѓачот не е во офсајд.

По натпреварот им забележал на играчите дека не можат преку ноќ да го менуваат односот кон професијата без да го известат членството. Посебно го разочарал голманот, кој одбранил пенал во завршницата и потоа се радувал како да не му уништил на човек цел викенд. Клубот му понудил фотографија со победничкиот состав, што тој го оценил како провокација.

Управата соопшти дека не може да гарантира иден успех или неуспех. Александар најави дека и следната недела ќе биде на трибините, бидејќи вистински навивач не го напушта клубот во тешки моменти. Особено кога конечно ќе почне да победува.