СКОПЈЕ — Маалскиот фудбалер Горан повторно обезбеди место во првиот состав откако селекторите утврдија дека топката е негова. И покрај трите изгубени топки и автоголот во претходниот термин, триесет и тригодишниот напаѓач останува единствениот играч без кого натпреварот буквално не може да започне.

„Не е сè во брзината. Некој мора да ја донесе инфраструктурата“, изјави Горан, кој самиот се поставил да ги изведува пеналите поради долгогодишната запознаеност со однесувањето на топката. Соиграчите го опишуваат како важен за атмосферата, особено откако еднаш се налутил, си заминал и ги оставил да трчаат меѓу два празни гола. Предлогот да одмори десет минути бил повлечен кога прашал дали да ја земе и пумпата.

Еден помлад играч понудил да донесе друга топка, но Горан оценил дека таа е премногу лесна, премногу тврда и генерално не е за овој терен. По кратки консултации, екипата решила да не го нарушува системот среде сезона. За следниот термин Горан најавил дека ќе дојде половина час подоцна. Другите деветмина веднаш се договориле да почнат да доцнат точно толку.