СКОПЈЕ — Триесет и четиригодишен рекреативец синоќа успешно ја заврши загревката за баскет во моментот кога другарите почнаа да си ги собираат работите. Тој соопшти дека конечно чувствува оти може да влезе во ритам, по што се наведна да си ги облече панталоните.

„На овие години не смееш само да дојдеш и да играш“, рече тој, додека внимателно го вртеше левиот глужд. Прво ги раздвижил зглобовите, потоа проверил дали затега листот, па направил неколку пробни движења за да утврди дали е безбедно да почне со загревање. Другарите во меѓувреме одиграле три партии.

На повикот да влезе во четвртата, одговорил дека му требаат уште две минути. Тие биле продолжени откако при пробниот скок му пукнало коленото, без болка, но доволно гласно за да побара мислење од сите присутни. Последниот шут го извел откако светлата на теренот веќе се изгасиле. Топката му ја вратиле за да ја однесе до автомобилот.

Дома на сопругата ѝ кажал дека бил час и половина на баскет. За утре закажал ден за одмор, бидејќи не сакал да го преоптовари телото по толку долго враќање во форма.