СКОПЈЕ — Рекреативна одбојкарска екипа синоќа го прогласи за најкорисен играч соиграчот што првпат успеа да собере пари за терминот од сите дванаесет пријавени. Тој не влегол во игра бидејќи до крајот на вториот сет се договарал со човекот што се откажал половина час пред почетокот.

„Му кажав дека може да плати и следната недела. Кога ми рече дека следната недела не може да дојде, му реков дека во тој случај може да плати и сега“, изјави одбојкарот. Уплатата стигнала во третиот сет. Неговите соиграчи побарале тајм-аут за да проверат дали е таа или парите од човекот што должи од септември.

По натпреварот екипата ја разгледала и кандидатурата на играчот што освоил девет поени. Двајца потврдиле дека игра одлично, но потсетиле дека минатата среда дошол без да каже дали ќе остане цел час и на крајот платил половина. За најкорисниот гласале сите, вклучително и тој што се откажал.

Капитенот најави дека наградениот следниот пат конечно ќе добие место во првата постава. За да може да се сосредоточи на играта, екипата едногласно одлучи парите да му ги даде по натпреварот.