СКОПЈЕ — Двајца навивачи на локален клуб во неделата ги сменија местата на трибината во 67. минута, по што нивниот тим постигна гол. Три минути подоцна противникот израмни. Двајцата веднаш се вратија на старите места, со образложение дека првата промена очигледно функционирала само додека противникот не се приспособил.

„Јас седнав два реда подолу, таа се помести едно место налево. Кога падна голот, си рековме дека конечно сме погодиле“, рече едниот навивач. Неговата другарка потврди дека имале намера да останат така до крај, но дека по израмнувањето забележале оти и тројца противнички навивачи станале од своите места.

За следниот натпревар подготвиле три распореди, во зависност од резултатот. Во случај на водство, никој нема да стане, дури ни на полувреме. Ако примат гол, прво ќе се премести тој што последен седнал. На останатите од редот им било кажано да не менуваат ништо без да се договорат.

Тренерот, прашан за придонесот на трибината, рече дека голот паднал по корнер. Навивачите потврдија дека токму тогаш седнале.