Скопјанка што вчера дошла да разгледа празен стан во Кисела Вода ја пречекал досегашниот потстанар во пижами и ѝ покажал слободно место меѓу креветот и вратата. Газдата, кој ја закажал посетата за десет наутро, ѝ објаснил дека станот е празен додека човекот е на работа, а вчера тој бил втора смена.

„Ми рекоа дека е слободен од први“, рече скопјанката. „Човекот ми рече дека од први навистина ќе биде слободен наутро. Дотогаш можело и сега да се разберат, само во среда да не закажувам ништо во спалната, зашто е слободен од работа.“

Газдата ѝ понудил договор за цел стан со попуст за часовите кога ќе се затекнат двајцата внатре. Досегашниот потстанар прашал дали тоа значи дека и нему ќе му се намали киријата. Газдата му рекол дека веќе му ја пресметал по стара цена, кога станот сè уште бил само негов.

Скопјанката си заминала без да потпише. На излегување го замолила газдата да ѝ се јави ако човекот се исели. Тој ја прашал дали има нешто слободно кај неа, за да го забрзаат процесот.