СКОПЈЕ — Еден факултет воведе задолжителни консултации за студентите што не го разбираат материјалот, во истиот термин кога професорот го предава материјалот. Одлуката следува откако студентите побарале повеќе време со професорот. Со новиот распоред, студентите во девет часот можат да изберат на која врата ќе го чекаат истиот човек.

„Бев пред кабинетот во девет. Колешката што остана на предавање ми пиша дека професорот токму тогаш објаснува зошто никој не доаѓа на консултации“, рече една студентка. Додека стигнала до амфитеатарот, професорот преминал на нова тема и ја упатил на консултации за делот што го пропуштила.

По приговорот, факултетот одредил асистент да дежура пред кабинетот. Асистентот ги запишувал прашањата и на крајот на часот му ги предавал на професорот, кој забележал дека голем дел од нив се однесуваат на материјал што бил објаснет истиот ден. Студентите добиле известување дека одговорите се достапни на предавање.

За следната недела факултетот воведе втор термин за консултации. Почнува во девет, во соседниот кабинет, за да не се создава гужва пред првиот.