СКОПЈЕ — Група студенти вчера го положија испитот по преговарање откако ја убедија професорката да го откаже. Разговорот почнал кога таа ги прашала како би постапиле ако другата страна не сака да преговара. Еден студент предложил за почеток да проверат дали таа навистина сака да остане на факултет до седум.

„Јас побарав да ни стави шестка. Колешката рече дека треба да почнеме од десетка за да има од каде да попуштиме“, рече студентот. Професорката им понудила седумка ако го завршат разговорот за пет минути. Тројца веднаш прифатиле, а четвртиот побарал да се запише дека токму неговото молчење помогнало да се постигне договорот.

По објавувањето на резултатите се јавиле и студентите што го полагале предметот во јунската сесија. Тие побарале да им се признаат бодови за тоа што тогаш останале до крајот на испитот. Професорката им одговорила дека нивниот договор е веќе склучен, но ги поканила да достават нова понуда.

Следната година предметот ќе има и практична настава. Првата задача е студентите да се договорат кој ќе ѝ каже на професорката дека нема потреба да доаѓа.