СКОПЈЕ — Студентот Никола синоќа го заврши групниот проект и сега ги чека останатите четворица членови да си ги напишат имињата, последната незавршена обврска пред рокот за предавање. Истражувањето, анализата и презентацијата се готови, но тимот сè уште не успеал да усогласи кој како се презива во индексот.

„Јас мојот дел го пратив уште вчера“, изјави еден колега, мислејќи на пораката „супер е“. Друг побарал името да му биде напишано со латиница, трета членка прашала дали мора да има број на индекс, а четвртиот сè уште чекал некој да му го испрати документот што веќе стоел во групата. Никола добил и забелешка дека насловната страница делува празно, по што сам ја преработил за подобро да се истакне заедничкиот труд.

На дваесет минути пред рокот, колегите предложиле краток состанок за распределба на заслугите. Било договорено секој да презентира по еден дел, под услов Никола претходно да им објасни што пишува во него. По предавањето, групата добила висока оценка за тимска работа. Колегите веднаш му пишале на Никола дека следниот проект би можеле повторно да го работат сите заедно, бидејќи веќе добро се уиграле.