СКОПЈЕ — Студент вчера не успеа да пријави испит по вовед во статистика бидејќи факултетот како предуслов барал положен испит по вовед во статистика. Од студентски прашања првично го упатиле кај професорот. Професорот му рекол дека може да полага кај него веднаш штом ќе го види на списокот на пријавени.

„Прашав дали можам да дојдам само да одговарам, па да ме запишат после“, рече студентот. Му објасниле дека оценката не може да се внесе без пријава, но дека за пријавата не е важна оценката. Доволно било во системот да стои дека испитот е положен.

Службеничката на шалтерот ја проверила и старата програма, во која предметот немал предуслов. Му предложила да се префрли на неа. За префрлање, меѓутоа, му требало уверение дека ги положил сите предмети од прва година. На уверението му недостигал само воведот во статистика.

Факултетот најави дека грешката ќе биде исправена пред следната сесија. За оваа сесија, соопштија оттаму, студентите што веќе го положиле испитот можат да го пријават без никакви пречки.