Кандидатот за градоначалник Бојан Ристов побарал да се навлече завеса околу неговата говорница на синоќешната телевизиска дебата, откако водителката го прашала дали ќе го поскапи паркирањето пред зградите. Ристов објаснил дека прашањето е чувствително и дека сака да одговори со истата загарантирана тајност со која граѓаните ќе гласаат за него.

„И мене ми е полесно да бидам искрен кога знам дека никој не ме гледа“, ѝ рекол Ристов на водителката. Техничарите донеле завеса од соседното студио и ја навлекле околу говорницата. Од зад завесата Ристов прашал дали микрофонот уште работи. Кога му рекле дека работи, неговиот шеф на штаб побарал да се исклучи, за кандидатот да може слободно да се изјасни.

Водителката му дала една минута за одговор. По истекот на минутата Ристов ја тргнал завесата и побарал во повторувањето да се скратат првите десет секунди, во кои, како што рече, се мислел дали да биде целосно отворен.

По дебатата, штабот соопшти дека кандидатот дал јасен одговор. Жителите што сакаат да дознаат колку ќе плаќаат за паркинг ќе можат да го прочитаат на првата сметка, во затворен плик.