Пратеник вчера предложи собраниските говори да траат најмногу две минути и побара реплика на сопственото излагање кога претседавачката му го исклучи микрофонот. До тој момент стигнал да ги поздрави присутните, да им се заблагодари на колегите што останале во салата и да најави дека нема да им одземе многу време.

„Бев спомнат по име и не можев да премолчам“, рече пратеникот по седницата. „Точно е дека самиот се претставив, но од тоа што успеав да го кажам можеше да се стекне впечаток дека немам аргументи. Морав да побарам збор за да го поправам тој впечаток.“

Во репликата пратеникот стигнал до првиот аргумент, по што побарал контрареплика бидејќи, според него, аргументот бил изваден од контекст. Претседавачката го замолила да посочи кој го извадил. Пратеникот се свртел кон пратеничките клупи, почекал неколку секунди и кажал дека ќе одговори кога повторно ќе добие збор.

Предлогот бил усвоен без дискусија. На излегување, пратеникот им рече на новинарите дека новото правило веќе дава резултат. „Денес тројца говорници завршија за шест минути. И сите тројца се согласивме.“