Зимска служба прогласи маалска улица за целосно проодна откако го истурка снегот од коловозот пред портите на сите куќи. Службата ја завршила работата пред седум наутро, доволно рано за жителите да ја видат чистата улица кога ќе излезат во дворовите.

„Ми се јавија од работа да прашаат дали можам да поминам. Им реков дека улицата е чиста, ја гледам оттука“, рече жителка што отворила една половина од портата пред таа да се заглави во снегот. Соседот од спроти, кој има излез и од задниот двор, бил првиот што стапнал на коловозот. Другите го замолиле да им каже како изгледа одблиску.

Откако еден жител си го расчистил влезот, службата повторно дошла по пријава за снег на коловозот. Возачот ја поминал целата улица и го вратил снегот пред истата порта. Во извештајот навел дека проодноста е обновена, а жителот добил потврда дека неговото барање за чистење е успешно решено.

За утре службата најави уште едно поминување. Соседите се договорија да не излегуваат додека да заврши, за да не му пречат на возачот.