Пациентка во скопска ординација вчера го потроши петминутниот термин за преглед откако на прашањето „Како сте?“ одговори „Добро, а вие?“. Лекарката почнала да одговара од учтивост, а пациентката ја прашала дали стигнала да одмори викендот. Кога конечно влегле во ординацијата, на вратата веќе чукал следниот пациент.

„Мислев дека ме прашува како сум додека да седнеме“, рече пациентката. „Кога сфатив дека тоа било првото прашање од прегледот, сакав да си го сменам одговорот. Лекарката ми рече дека може, но за денес веќе имам одговорено.“

За следниот термин се договориле да се поздрават во ходникот пред да почнат да им течат минутите. Медицинската сестра им предложила да дојдат пет минути порано, бидејќи и пациентот по нив побарал да се поздрави однапред. Пациентката прашала дали тоа значи дека за поздравот сега се чека посебно.

На излегување лекарката ѝ рекла дека се надева оти до следната средба ќе биде подобро. Пациентката за малку ќе ѝ речела „И вие“. Наместо тоа, излегла и си ја зачувала реченицата за во ходник.