СКОПЈЕ — Гулабите на еден скопски плоштад успеале да научат тројца биолози да доаѓаат со храна секое утро во девет, покажа истражување за тоа дали гулабите можат да научат да доаѓаат во девет. Научниците почнале со набљудување пред шест недели, кога птиците сè уште доаѓале кога ќе им текнело.

„На почетокот фрлавме по малку за да ни се приближат“, рече раководителката на тимот. „На третиот ден еден гулаб само нè погледна и си замина. Следното утро донесовме двојно повеќе.“ По првата недела гулабите почнале да се собираат на плоштадот дури откако некој од тимот ќе посегнел во џеб.

Во втората фаза истражувачите го поместиле терминот за еден час. Гулабите во девет се појавиле пред прозорецот на лабораторијата. Тимот се вратил на стариот распоред за да не се наруши експериментот, а во сабота на плоштадот почнал да доаѓа и колега што воопшто не бил вклучен во проектот.

Истражувањето заврши во петокот. Во понеделникот во девет на плоштадот се појавија двајца нови практиканти. Гулабите ги пуштија прво да им се приближат.