СКОПЈЕ — Истражувачка екипа од домашен институт доби нов грант за да утврди зошто од претходниот грант не останале пари за истражување. Проектот ќе трае две години и веќе се смета за перспективен, бидејќи има обезбедено финансирање за првите три извештаи за обезбеденото финансирање.

„Не сакаме да избрзуваме со заклучоци пред да одржиме почетна конференција“, изјави раководителката на екипата. За конференцијата се предвидени хотел, превоз и печатени торби. Научниците разгледувале можност да се соберат во сопствената лабораторија, но таму немало соодветен ѕид за фотографирање пред логоата на партнерите.

Првичната хипотеза е дека средствата исчезнуваат меѓу одобрувањето и купувањето реагенси. За да се испита тој интервал, ангажирани се координатор, заменик-координатор и експерт за видливост на резултатите што допрва треба да се добијат. На еден млад истражувач му е дозволено да го користи микроскопот, доколку прво помогне со табелата за работни часови.

Конечниот труд ќе биде достапен бесплатно за јавноста, штом институтот плати да биде објавен. Екипата веќе подготвува продолжение на проектот, бидејќи сегашниот буџет не ја покрива проверката дали нешто од него стигнало до науката.