Двајца соседи цела недела си префрлаа кој му го забавува интернетот на другиот, пред да откријат дека и двајцата користат мрежа од станот на приземје. Станарката од вториот кат прва се посомневала кога врската ѝ се подобрила додека соседот бил на работа. Тој ѝ рекол дека и кај него работи подобро кога таа е излезена, што двајцата го примиле како признание.

„Му предложив да се договориме кој кога ќе гледа серија. Тој рече дека во девет му е редот, па јас почнав во осум и педесет“, изјави станарката. Таа вечер сликата им замрзнала истовремено. Двајцата излегле на балкон да се прашаат што пуштил другиот.

Од приземјето им довикнала сосетката дека го исклучила интернетот додека го чистела аголот. Кога ја прашале дали може повторно да го вклучи, таа ги замолила прво да ѝ кажат чија е мрежата на која таа се приклучува секојпат кога нејзината ќе падне.

Следното утро тројцата се собрале да утврдат кој плаќа интернет. Управителот на зградата им побарал да почекаат да му заврши епизодата.