Една општина ги иззеде жабите од правилата за ноќна тишина откако станари од новата населба крај барата побараа да престане крекањето по десет. Од општината објаснија дека барата била таму пред зградите и дека не можат да им достават опомена на жабите без да утврдат која почнала.

„Не бараме да ги иселат. Нека крекаат до десет, како и сите други“, рече станар од приземјето. Двајца инспектори излегле на терен и чуле крекање од повеќе страни. Кога едниот се приближил до брегот, жабите замолкнале. Записникот го затвориле со забелешка дека во присуство на службено лице немало прекршок.

Станарите побараа да го видат решението со кое жабите се ослободени од куќниот ред. Општината го испрати до управителот на зградата, кој го закачи во влезот. Следната вечер некој го одлепил и го ставил на камен до барата, за со решението да се запознаат и тие на кои се однесува.

Управителот денес најави состанок на отворено за да се слушнат двете страни. Состанокот е закажан во десет, кога жабите обично земаат збор.