СКОПЈЕ — Две другарки испратени да ја продолжат кавгата на еден скопски пар се смирија за шест минути, соопштија двете страни. Парот два дена не разговарал откако тој ја поканил сестра му на гости во недела, а таа му рекла дека слободно може и да ја пресели кај нив.

„Имав насока да почнам од тоа дека кај нив никој никогаш ништо не прашува“, рече другарката на девојката. „Другата ми кажа дека сестрата може да дојде и во сабота. Реков добро. Дури на враќање ми текна дека требаше прво да побарам да се извини за Велигден.“

Парот ја одби спогодбата бидејќи другарките се договориле само кога ќе дојде сестрата. Дечкото побарал на следната средба да се утврди кој прв почнал да зборува со тон. Девојката се согласила под услов расправата да почне од денот кога тој првпат ѝ рекол дека има тон.

Другарките се видоа повторно во неделата, овој пат со сестрата, која од нив дознала дека воопшто е поканета. Сите три се договориле да излезат. Парот остана дома за во мир да се скара околу тоа кој им ја расипал неделата.