СКОПЈЕ — По четири години врска, Елена и Дамјан во неделата постигнаа договор за заедничката иднина, откако ја ограничија на периодот до следниот вторник во 20 часот. Разговорот почнал со прашањето дали да живеат заедно, а завршил со согласност дека во вторник ќе вечераат кај неа.

„Штом реков дека во среда сум втора смена, за првпат вечерта имавме нешто конкретно“, рече Дамјан. Елена предложила да остане да преспие, со што договорот накратко се проширил до среда наутро. Точката ја повлекле кога тој прашал дали да си донесе облека за на работа или веќе може да остави нешто во нејзиниот плакар.

За да го задржат напредокот, двајцата утврдиле дека прашањето за плакарот ќе се отвори ако во вторник завршат со вечерата пред осум. „Можеме и порано да јадеме“, предложила Елена. Дамјан побарал тоа да се разгледа во вторник, кога ќе знае колку е гладен.

Парот во понеделникот потврди дека договорот е на сила. Елена го прашала дали може да им каже на своите дека конечно направиле план. Дамјан се согласил, под услов да им каже што ќе јадат.