Кандидат за градоначалник вчера застана пред секоја од седумте дупки на една маалска улица и вети дека ќе ги закрпи во првиот месец од мандатот. Утрово неговиот штаб се врати со седум големи фотографии од посетата и ги положи преку дупките. На секоја фотографија кандидатот покажува кон дупката што се наоѓа под неа.

„Вчера имавме проблем на седум места. Денес на тие места се гледа кандидатот“, рече одговорната за кампањата. Еден жител ја поткренал фотографијата пред својот влез за да провери дали има асфалт. Од штабот го замолиле да ја спушти, бидејќи зад него веќе чекала екипа да ја сними улицата по санацијата.

До пладне ветерот префрлил две фотографии пред соседната зграда. Кандидатот дошол лично да ги врати и притоа открил осма дупка. Одбил да застане пред неа додека фотографот не му потврди дека има уште хартија.

За вечерва е најавен дожд. Штабот ги повика жителите да не ги газат фотографиите додека се мокри, за да не направат нови дупки во кампањата.