СКОПЈЕ — Една фирма вчера воведе флексибилен датум за исплата, со кој вработените можат да ја очекуваат платата кој било ден во месецот. Од раководството велат дека новиот модел им дава поголема слобода на работниците, кои досега морале да го чекаат петтиот, а отсега можат да чекаат кога им одговара.

„Јас избрав да ја очекувам на први. Тогаш ми е киријата“, рече вработена. Од сметководството ја пофалиле што навреме си ги планира трошоците и ѝ објасниле дека изборот на датум е личен, додека исплатата зависи од фирмата. Ѝ предложиле да избере и резервен датум за да не се разочара двапати во ист ден.

По неколку прашања од вработените, фирмата вовела неделно известување. Првото соопштение потврдило дека платата е во подготовка. Второто ја потврдило валидноста на првото. Еден работник прашал дали може да го препрати известувањето кај газдата на станот. Му рекле дека може, бидејќи во него нема конкретен датум што би требало да се крие.

Следниот месец фирмата ќе воведе и флексибилен почеток на работното време. Од вработените се бара да изберат кога сакаат да почнат и да бидат на работа во осум.