СКОПЈЕ — Триесетгодишен маж во неделата за првпат ручаше со родителите на девојката и до крајот на посетата доби половина од дрвата за редење во шупата. Таткото му ги покажал во дворот веднаш откако му рекол дека отсега може да се чувствува како дома.

„На маса ме праша дали сум слободен следната недела. Мислев дека ме кани пак на ручек, па реков дека сум слободен и сабота“, рече момчето. Таткото ја прифатил понудата и предложил во сабота да ги пренесат дрвата, а во недела да видат дали има време и за ручек.

Девојката се обидела да објасни дека врската е сè уште свежа и дека тој не мора веднаш да се обврзува. Таткото се согласил и рекол дека за почеток ќе ги редат само сувите дрва, додека за другите може да разговараат кога подобро ќе се запознаат. Момчето прашало колку ги има. Таткото излегол да му ги покаже и тие.

На заминување мајката го прашала дали убаво си поминал. Тој рекол дека му било многу пријатно. Од дворот таткото му довикнал да дојде во осум.