СКОПЈЕ — Новиот тротоар во една скопска населба конечно им обезбеди на возачите рамно и суво место за паркирање, отстранувајќи ја долгогодишната потреба да ги оставаат автомобилите на кал. Пешаците го поздравија проектот од коловозот, каде привремено се движат додека трае трајното користење на тротоарот.

„Порано едното тркало ми пропаѓаше. Сега и вратата можам убаво да ја отворам“, изјави жител што прв ја испробал новата инфраструктура. Според него, ширината е добро погодена, иако дрвјата на неколку места непотребно го стеснуваат просторот. Една мајка со количка прашала каде е предвидено да поминува. Соседите ѝ посочиле дека меѓу две паркирани возила има спуштен рабник, под услов сопственикот на сивото да се помести малку понапред.

Од општината соопштија дека проектот ја подобрува пешачката поврзаност и објавија фотографија направена пред да се вратат автомобилите. За заштита на тротоарот се разгледува поставување столпчиња, на што жителите се спротивставиле бидејќи ќе го отежнат пристапот до новиот тротоар со возило. Следната фаза предвидува обележување пешачка патека. Возачите побарале линијата да биде доволно бледа за да не остава траги на гумите.