Апликација за достава во Скопје почна да ги праќа пратките на една станарка кај соседот кат подолу. Системот ја избрал неговата врата бидејќи таму биле успешно примени последните четири пратки. Сите четири, според станарката, стигнале таму по грешка. Соседот ги примал за доставувачите да не си одат со нив.

„Му довикнав на човекот дека сум горе. Ми рече дека ме гледа, ама дека кај него на екранот сум долу“, рече станарката. Доставувачот се качил да ѝ ја предаде пратката, па слегол да ја означи како доставена од местото каде што му дозволувала апликацијата.

За следната нарачка станарката го внела својот кат и во полето за забелешки. Поддршката ја повикала да провери дали се преселила. Кога рекла дека отсекогаш живее горе, од неа побарале потврда од човекот што досега ги примал пратките на нејзината адреса.

Соседот се согласил да потврди. Системот му испратил документ за потпис. Доставувачот заѕвонил кај него и прашал дали може да го прими и овој, бидејќи жената горе не му отворала.