СКОПЈЕ — Еден скопски маркет го прогласи редовниот муштерија Дамјан за работник на месецот, откако на самонаплатната каса сам измерил зеленчук, скенирал четириесет производи и му објаснил на човекот зад него каде се избира леб. Наградата му била врачена пред да плати, за да не мора повторно да влегува во објектот.

„Има одлична работна етика. Доаѓа и во недела, никогаш не бара пауза и секогаш остава пари“, изјави управителката. Според интерната евиденција, Дамјан овој месец сам опслужил повеќе кошници отколку двајца вработени на скратено работно време. Единствена забелешка е што еднаш викнал помош за пиперките, наместо самостојно да ја преземе одговорноста за шифрарникот. Неговото барање за попуст било одбиено бидејќи признанието не подразбира дека навистина работи таму.

По доделувањето, управителката го замолила да остане уште пет минути, додека колешката се врати од магацин, и да им помага на другите купувачи. Дамјан одбил, објаснувајќи дека доцни на својата работа. Маркетот соопшти дека ваквото однесување ќе биде земено предвид при изборот следниот месец. На излезот добил порака да ја оцени услугата што самиот си ја дал.