СКОПЈЕ — Жителите на една маалска улица добија куќни броеви според редоследот по кој се јавиле во општината. Првиот број го добила куќата на средина, чија сопственичка се јавила да праша кога ќе почне нумерирањето. Број два е на крајот од улицата, а број три е веднаш до деветнаесет, чиј сопственик се јавил по работа.

„Секој што се јави доби број истиот ден“, рече службеничката што го водела списокот. На прашањето како поштарот да стигне од три до четири, таа објасни дека четворката прво се јавила за куќата на мајка си, па треба да се провери и соседната улица.

Поштарот првата пратка ја доставил откако примачот го упатил по стариот систем, до портата веднаш зад куќата каде што порано имало дуќан. Општината го оценила тоа како доказ дека новите адреси успешно се користат со мала помош од жителите. За новодоселените ќе организира кратка прошетка со поштарот.

Последната ненумерирана куќа добила известување дека барањето може да го поднесе писмено. Во образецот за доделување куќен број, полето за куќен број било задолжително.