Станари од една скопска зграда вчера добија известување дека водата ќе биде исклучена од девет до пладне, иако од претходната вечер веќе немаа вода. Претседателката на куќниот совет се јавила да праша дали најавениот прекин го вклучува и оној што веќе трае. Од водоводот ѝ рекле дека тој ќе се разгледува одделно, бидејќи не бил најавен.

„Во девет чекавме да чуеме дали ќе се смени нешто. Цевките беа исто толку тивки како и во осум“, рече станарка од вториот кат. Таа побарала екипата накратко да ја пушти водата, за да можат да наполнат нешто пред официјалниот прекин.

Екипата пристигнала во единаесет и утврдила дека зградата е на два работни налога. По првиот треба да ја исклучи водата, по вториот да ја пушти. Мајсторот предложил да ги изврши по обратен редослед, но диспечерот го замолил да почека да заврши првиот.

Точно напладне станарите добиле порака дека најавениот прекин завршил. За водата ќе добијат посебно известување.