СКОПЈЕ — Министерката на денешната прес-конференција ги упати сите прашања за пробиените рокови до својот наследник, за кого кабинетот соопшти дека ќе биде избран кога ќе има потреба да одговори. За него беше оставено празно столче десно од министерката. Лево имаше уште едно, за претходникот, кај кого новинарите беа упатени за роковите што веќе истекле.

„За она што било пред мене можам да ви кажам кој бил, а за она што ќе биде по мене ќе можам да ви кажам штом дознаам“, рече министерката. На прашањето за рок што истекува вечерва, од кабинетот побараа новинарот да почека до утре, кога точно ќе се знае на кое столче припаѓа прашањето.

Една новинарка праша за проект што завршил навреме. Министерката веднаш го приближи микрофонот и објасни дека лично го следела од самиот почеток. Кога ѝ посочија дека проектот бил почнат во претходниот мандат, од кабинетот појаснија дека во тој случај почетокот се смета од денот кога таа почнала да го следи.

За следната прес-конференција кабинетот најави три микрофони. Двата на краевите ќе бидат исклучени за да нема пречки додека министерката зборува за резултатите.