СКОПЈЕ — Двајца родители синоќа првпат по шест месеци излегоа сами, откако најдоа бебиситерка што ќе им овозможи од другата страна на градот да прашуваат дали детето заспало. Првата порака ја испратиле пред да стигнат до крајот на улицата. Тогаш бебиситерката сè уште ги соблекувала чевлите.

„Се договоривме да не ја вознемируваме цела вечер. Јас ќе прашам еднаш, па ако треба нешто друго, тој ќе праша“, рече мајката. Кога добиле одговор дека детето мирно си игра, таткото се јавил да уточни дали играта е доволно мирна за да заспие после неа. Потоа двајцата продолжиле кон местото каде што требало да се видат со пријателите.

Пред да влезат, бебиситерката им пишала дека детето заспало. Мајката предложила да се вратат дома порано, бидејќи ретко се случува да имаат слободна вечер додека тоа спие. Таткото се согласил, но побарал да почекаат уште малку за да не се разбуди кога ќе ја отворат вратата.

Дома стигнале во девет и дваесет. Детето спиело. Бебиситерката ги прашала дали добро си поминале, а тие ја замолиле да им пише кога ќе стигне дома.