Пратеничка од Скопје ги префрли средбите со граѓани во градски автобус, каде што секој добива по една станица да го изложи својот проблем. За оние што сакаат и да го слушнат одговорот, асистентката препорачува да си остават пари за уште една станица. Пратеничката седи до патеката за да може да ги слуша и граѓаните што патуваат стоечки.

„Успеав да ѝ кажам дека кај нас нема тротоар, ама баш кога ме праша на која улица, ми рече дека тоа веќе е второ прашање“, изјави еден патник. Тој се симнал, ја претрчал раскрсницата и повторно се качил на следната станица, каде што уредно се претставил како нов соговорник.

По првиот ден асистентката утврдила дека во сообраќаен метеж граѓаните добиваат доволно време и за дополнителни прашања. За да имаат сите еднаков третман, од понеделник средбите ќе се одржуваат само на делницата каде што автобусот најбрзо поминува.

На крајната станица пратеничката соопшти дека ги слушнала сите. Возачот почнал да ѝ објаснува дека и тој има проблем, но таа веќе била симната.