СКОПЈЕ — Едно семејство во саботата во девет наутро пристигна пред затворената училишна порта, откако во родителската група прочита 186 пораки за приредбата и ја пропушти единствената во која пишуваше дека е преместена за недела. Таткото бил задолжен да го провери терминот. Тој потврдил дека повеќето родители во петокот вечерта напишале „важи“.

„Прочитав дека сите се согласуваат. Не проверив со што, бидејќи веќе бевме на сто и дваесетта порака“, рече тој. Мајката потврди дека детално го следела разговорот за тоа дали децата треба да дојдат десет минути порано. Во ниту еден момент, според неа, не било доволно јасно пред кои девет часот.

Од пред портата семејството испратило прашање дали некој друг е пристигнат. Првиот одговор бил дека прашањето е веќе одговорено погоре. Вториот родител побарал сите да престанат да пишуваат за важните информации да не се губат. На таа порака одговориле уште единаесетмина.

Во неделата семејството стигнало навреме. Таткото го дознал терминот од ќерка си, која цела недела знаела кога настапува и чекала некој да ја праша.