Две соседни европски држави именуваа амбасадори што со години живеат во земјата во која се испратени, соопштија нивните министерства. Со одлуката заштедиле на преселба, привремено сместување и првична ориентација. Едниот амбасадор стигнал на работа со истиот автобус со кој и дотогаш се возел, само се симнал една станица порано.

„Ми рекоа дека првиот месец треба да го запознаам градот. Им предложив наместо тоа да им објаснам зошто во вторник не треба да закажуваат ништо во центарот“, рече амбасадорката, која таму живее седумнаесет години. Министерството ѝ побарало сепак да испрати извештај со први впечатоци. Таа ги прашала дали важи тоа што им го напишала кога првпат ѝ го исклучиле парното.

Првиот дипломатски прием го одржале во сабота. Амбасадорите се ракувале пред камерите, а потоа се договориле да си заминат порано бидејќи и двајцата имале гости дома. Протоколот го завел тоа како прв договор постигнат без посредници.

За следниот месец министерствата најавија службено патување на двајцата дипломати во матичните земји. И двајцата побараа дневници за странство.