СКОПЈЕ — Станарите на една зграда во саботата го оставија светлото во дневните соби до два по полноќ за соседот што правеше врева да сфати дека никој не спие. Соседот, гледајќи ги осветлените прозорци, заклучил дека сите се будни и продолжил со роденденот уште еден час.

„Излегов на балкон и го видов човекот од трети. И тој излезе, се погледнавме и двајцата влеговме внатре. Мислев дека отиде да му ѕвони“, рече станарка од вториот кат. Соседот од третиот потврди дека влегол за да не изгледа како да ја надгледува додека таа оди да му ѕвони.

Во еден и пол, во групата на зградата се појавила порака со прашање дали уште некој ја слуша музиката. Седуммина одговориле дека ја слушаат. Осмиот, кај кого се одржувала прославата, прашал дали да ја пушти погласно за да се слуша и на приземје.

Станарите за недела закажаа состанок за куќниот ред. Одлучија да го одржат во ходникот, каде што и славеникот ќе може да ги чуе без да му заѕвонат.