На скопска раскрсница вчера беше пуштено копче со кое пешаците можат да побараат зелено светло. До него општината оставила службеник да провери дали тие навистина сакаат да преминат. Првата пешачка посегнала по копчето, но службеникот ја замолил да почека и да му каже дали оди само до другата страна или планира и да се врати.

„Му реков дека одам до таму и дека по работа ќе се вратам“, рече пешачката. „Тој ме праша дали тогаш можеме да го оставиме барањето отворено. Му реков дека не знам во колку ќе завршам. Ме замоли да не притискам додека не утврдиме што точно барам.“

Во меѓувреме се собрале уште тројца пешаци. Службеникот ги прашал дали сите одат заедно за да поднесат едно барање. Еден рекол дека не ги познава другите, но би преминал со нив ако веќе ќе се пали зелено. Службеникот им дозволил да притиснат кога сфатил дека и самиот треба да оди на спротивниот тротоар.

Попладнето општината соопшти дека копчето работи во двете насоки. Службеникот побарал уште еден колега за другата страна, бидејќи на крајот од смената морал некого да праша дали може да се врати.