Две соседни земји што со месеци преговараат за отворање на патот преку планинскиот превој вчера го испратија истиот преговарач на завршната седница. Двете влади соопштија дека човекот има целосна доверба од нивната страна. Тој пристигнал прв, побарал да го остават сам и почнал да ја преместува столицата од едниот крај на масата на другиот.

„Од едната страна предложив патот да се отвора во шест наутро. Додека да седнам од другата, веќе ми беше јасно дека шест е неприфатливо“, рече преговарачот. „Во шест и пет можевме да се најдеме, ама морав уште еднаш да станам за да проверам дали ќе помине.“

По три часа двете влади објавија дека другата страна попуштила. Едната соопшти дека издејствувала отворање веднаш по шест, а другата дека го спречила отворањето во шест. За да нема забуна, преговарачот дал две изјави во ходникот, со пауза меѓу нив за новинарите да ги сменат местата.

Патот утрово останал затворен. Според договорот, на првото отворање треба да присуствуваат двајцата преговарачи, секој од својата страна на рампата.