СКОПЈЕ — Родители на шестгодишно девојче викендов воведоа демократско одлучување во домот, откако претходно се договориле каде ќе одат, колку ќе останат и што ќе облече детето. Девојчето добило целосна слобода да избере меѓу тргнување сега и тргнување за десет минути.

„Важно ни е да знае дека и нејзиниот глас се слуша“, изјави мајката, која трипати го повторила прашањето додека не го слушнала потребниот одговор. Предлогот да останат дома бил внимателно разгледан и отфрлен како тема за некој друг разговор. Таткото нагласил дека детето само одлучило да оди кај баба си.

За да не се чувствува надгласано, девојчето потоа добило право да избере по кој пат ќе одат. Кога го избрало подолгиот, родителите објасниле дека тој ден се гласа само за патишта по кои има време да се стигне. Изборот на облека поминал полесно, откако двете понудени комбинации биле сведени на истите панталони.

На крајот од денот родителите ја пофалиле дека зрело учествувала во семејните одлуки. Девојчето побарало утре тие да изберат дали ќе си играат со неа два часа или три. Мајката рекла дека така не функционира изборот.