Скопјанката Ивана ја вклучила опцијата за бришење дупликати во семејниот фотоалбум и од седум години слави ѝ останала една фотографија. Апликацијата ги препознала истата маса, истите девет лица и истиот распоред на столиците. Ја зачувала најострата слика, на која тетката конечно гледа кон камерата.

„Мајка ми веднаш рече дека таа е од 2019, бидејќи чичко ми уште седи до прозорецот“, рече Ивана. „Ѝ покажав дека седи таму на сите. Тогаш ми објасни дека во 2022 седнал таму од инает, што очигледно се гледа ако знаеш со кого се скарал.“

Мајката извадила неколку печатени фотографии за да покаже дека славите се разликуваат. На една, рече, брат ѝ станал по салата, а на друга се вратил од кујна со леб. Ивана ги споредила. На двете братот стоел зад истата столица со празни раце.

За следната слава Ивана предложила сите да ги сменат местата за да имаат нова фотографија. Мајка ѝ се согласила, под услов прво да се сликаат како што треба.