СКОПЈЕ — Дваесет и деветгодишната Сара во саботата ја донесе најдобрата другарка на првиот состанок со Марко, бидејќи другарката ги имала прочитано сите пораки и подобро паметела што сакал да каже. Сара ја претставила како Јана, а Марко ја препознал по тоа што и двете во ист момент го прашале зошто во вторникот напишал „може“.

„Мислев дека ме прашува дали сум слободен во сабота“, рече Марко. Јана потврди дека тоа е едно од трите толкувања до кои стигнале со Сара. Другите две, според неа, и понатаму биле можни, особено ако се земе предвид дека одговорил по четириесет минути.

Кога Марко предложил да прошетаат, Сара се согласила. Јана побарала да почекаат додека утврди дали предлогот се однесува на сите тројца. Марко рекол дека мислел на Сара, по што Јана се тргнала неколку чекори настрана за да може Сара на мир да ја праша што мисли за одговорот.

Следното утро Марко ѝ пишал на Сара дека убаво си поминал. Јана одговорила дека и таа.