На граничен премин во една мала европска држава царината задржа триесетгодишен повратник откако во образецот за навики стекнати во странство пријавил дека доаѓа навреме. Според службениците, навиката може да се внесе за лична употреба, но патникот кажал дека има намера да ја практикува и на работа.

„Го прашавме дали ќе очекува и колегите да доаѓаат навреме. Ни рече дека тоа се подразбира“, изјави цариничката што го примила образецот. Со тој одговор, објасни таа, навиката веќе се смета за наменета за ширење. Патникот побарал да ја остави на граница, но службениците му рекле дека мора лично да се одвикне.

За проверката му закажале разговор во девет. Тој дошол во девет и бил вратен во чекалницата. Во десет и дваесет го повикале повторно, а тој одговорил дека ќе дојде за пет минути. Службениците го внесле одговорот во записникот и му дале уште половина час да покаже дека го мисли сериозно.

Преминот му беше одобрен напладне. На излегување побарал потврда за доцнењето. Цариничката му рекла дека ќе биде готова утре. Тој прашал кој ден точно.