Претседателка на мала европска држава вчера беше пречекана на аеродром со два метра црвен тепих, кои двајца службеници ги преместуваа пред неа на секои три чекори. Според протоколот, гостинката требало да помине триесет метри до автомобилот. Првите шест ги поминала за четири минути, вклучувајќи го враќањето за половина чекор за да можат да го кренат тепихот.

„На пробата одевме со колега од протокол што прави пократки чекори“, рече шефицата на пречекот. „Затоа и тргнавме со тројца во почесната стража. Другите требаше да ни се придружат по пат, ама нè чекаат кај автомобилот.“

На половина пат возачот предложил да ја скрати церемонијата и да вози наназад до делегацијата. Службениците му покажале каде да запре, па го подигнале тепихот за да му направат место. По кратко советување го поставиле од другата страна, каде што задната врата можела целосно да се отвори.

Претседателката влегла во автомобилот и се заблагодарила за пречекот. Кога возачот прашал дали може да тргне, од протокол му рекле да почека: претседателот домаќин штотуку се појавил кај авионот и побарал да му го вратат тепихот за да ѝ тргне во пресрет.