Скопјанец вчера го исчисти станот пред да дојде жената што ја ангажирал за чистење, а кога таа пристигнала, ја замолил да не гледа под каучот. Таму, како што ѝ објаснил, сè уште имало прашина од пред да почне да чисти, па не сакал да помисли дека така го остава станот кога очекува некого.

„Прво ги собрав работите за да може да помине“, рече домаќинот. „Потоа видов колку прашина има под нив и си реков нема смисла да ѝ го оставам баш тоа. Кога заѕвони, ја пребришував масата вторпат, бидејќи првиот пат ја пребришав набрзина за да не ме затекне како чистам.“

Жената го прашала од каде сака да почне. Тој ѝ ги набројал кујната, ходникот и бањата, па за секоја просторија објаснил зошто веќе нема потреба да влегува. Кога таа тргнала кон каучот, домаќинот побарал уште две минути за да го помести и да провери што точно ќе најде.

На крајот жената го замолила да излезе малку, за да може да работи. Скопјанецот излегол и се вратил по еден час. Пред да отклучи, заѕвонил, за да ѝ даде време да среди.